Universitet: Bachelorprogram i administrasjon og organisasjonsvitskap

Administrasjon og organisasjonsvitskap er eit spesialisert statsvitskapleg fag. Det er eit samanliknande studium av politikk, forvaltning og organisasjon. Fokus blir retta særleg mot utforminga og iverksetjinga av offentleg politikk: korleis innhaldet i og organiseringa av denne politikken blir til, og kva for konsekvensar dette har for verdifordelinga i samfunnet. Demokratiteoriar og teoriar om organisasjonar, forvalting og offentleg politikk utgjer sentrale referanserammer for faget. I forhold til andre samfunnsvitskaplege fag er vi såleis meir opptekne av den politiske organiseringa og styringsformene i samfunnet. Viktige tema er deira normative grunnlag, korleis dei vert utvikla og endra, og kva for verknader dette har.

Bachelorprogrammet i administrasjon og organisasjonsvitskap skal omfatte minimum 20 og maksimum 30 studiepoeng med innføringsemne medrekna ex.phil., 90 studiepoeng (1½ års studium) med spesialisering innanfor administrasjon og organisasjonsvitskap, og 60 studiepoeng med valfrie emne.

Det første semesteret skal førebu deg fagleg og metodisk til vidare studium. Vi rår deg derfor til å studere emna innføring i administrasjon og organisasjonsvitskap og samfunnsvitskaplege tenkjemåtar i tillegg til ex.phil.

Emna i det andre og tredje semesteret skal gi deg ei innføring i sentrale idear og kunnskapsområde i faget, og bidra til å gi deg betre forståing for ein vitskapleg arbeidsmåte. Emna skal samstundes gi ei innføring i dei elementære metodane for slikt arbeid. Innføringa skal hjelpe deg til å utvikle ei kritisk og utprøvande haldning til forskingsresultat. Det er også eit mål å setje deg i stand til å formidle og bruke tenkjemåten og innhaldet i faget i ulike yrkessamanhengar. Med dette skal det utviklast ei forståing for faget sin plass i ein større samfunnsvitskapleg samanheng.

I fjerde, femte og sjette semester, tek emna sikte på å vidareutvikle evnene dine til å gjere sjølvstendige analyser av organisasjonar, av offentleg politikk og av komplekse sett av organisasjonar og politikkfelt. Det blir lagt vekt på samanhengen mellom formell organisering på den eine sida og konsekvensar og utfall på den andre.

Dei siste 60 studiepoenga av bachelorprogrammet er frie studium, som det ikkje vert stilt krav til samansetjinga av. Du kan til dømes ta inn språkemne, naturvitskaplege emne, studium frå utanlandske universitet eller andre samfunnsvitskaplege fag. Du kan også ta inn inntil eitt års utdanning frå tidlegare studium, så sant desse emna ikkje overlappar med emna i spesialiseringa di.

Bachelorprogrammet i administrasjon og organisasjonsvitskap vil da sjå slik ut:

SemesterEmnenamnEmnekodeSp1. semesterEx.phil.
Innføring i administrasjon og organisasjonsvitskap
Samfunnsvitskaplege tenkjemåtarEXPHIL

AORG 100
SV 10010

10
102. semesterPolitisk teori og styringsformer
Organisasjonsteori eller
Stat og forvaltning i utviklingslandAORG 104*
AORG 101*
AORG 10515

153. semesterSamfunnsvitskapleg metode
Politikk og forvaltning eller
OrganisasjonsteoriMET 102*
AORG 103
AORG 10115

154., 5. og 6. semester Bacheloroppgåva
Politisk styring og organisering eller
Organisasjonsteori
Valfrie emneAORG 250*
AORG 209
AORG 21030

15
45TOTALT: 180 studiepoeng (3 år)

* Emna er obligatoriske i graden

sp = studiepoeng