Universitet: Masterprogram i biologi - Celle- og utviklingsbiologi

Målet med programmet er å gi deg innsikt i og oversikt over fagområdet celle- og utviklingsbiologi ut frå ei fysiologisk og anatomisk tilnærming. I løpet av programmet vil du mellom anna tileigne deg solid erfaring med bruk av generell cellebiologisk metodikk, som også kan brukast innanfor all annan eksperimentell biologi. Faggruppa disponerer godt utstyrte laboratorium og legg vekt på god oppfølging. Den sjølvstendige masteroppgåva vil vere knytt til pågåande forskingsprosjekt som spenner over eit breitt spekter frå grunnforsking til målretta praktiske prosjekt. Gjennom programmet vil du få opplæring i å gjennomføre ei sjølvstendig vitskapleg oppgåve.

Masterprogrammet omfattar eit sjølvstendig vitskapleg arbeid (masteroppgåve) på 60 eller 30 studiepoeng og emne eller spesialpensum på minst på 60 studiepoeng.

Du skal i samråd med rettleiaren velje ei masteroppgåve som svarer til 60 sp., men du kan også skrive ei oppgåve på 30 sp. Saman skal de utarbeide ei prosjektskisse og lage ein framdriftsplan som inneheld viktige milepålar i arbeidet med oppgåva. Oppgåva skal vere eit forskingsbasert arbeid. Tema i oppgåva kan veljast innanfor forskingsområda til dei aktuelle rettleiarane.

I arbeidet med masteroppgåva skal du på sjølvstendig vis ta i bruk metodar og vitskaplege arbeidsteknikkar frå faget i undersøkinga av eit relevant materiale. Analysar av observasjonsdata og data frå modellar er svært viktig ved
sida av teoretiske og eksperimentelle studiar.

Studiet skal gi deg godt grunnlag for arbeid innanfor forsking, offentleg forvalting, miljøvern, skoleverk, havbruk og legemiddelindustri.