Universitet: Masterprogram i matematikk - Algebra/algebraisk geometri

For deg som synest at noko av det mest spennande med matematikken er overgangen frå eit spesialtilfelle til studiet av det underliggjande generelle rammeverket, kan eit masterstudium innanfor rein matematikk vere eit givande alternativ. Algebra er eit klassisk felt som er knytt til studiet av polynom i fleire variablar. Feltet har oppstått for å løyse abstrakte problem som stammar frå nærliggjande fagfelt som fysikk, kjemi og etter kvart informatikk, og frå andre delar av matematikken, som talteori. Algebraisk geometri er eit område der ein nyttar algebra for å studere visse geometriske objekt. Nokre av problemstillingane går fleire hundre år tilbake, men det finst også bruk av algebraisk geometri for å forklare og løyse problem som oppstår innanfor kodeteori og fysikk.

Oppbygging av studiet

Masterprogrammet i algebra/algebraisk geometri omfattar:

1. Eit sjølvstendig vitskapleg arbeid (masteroppgåve) med eit omfang på 60 sp. (Ein kan også få korte oppgåver med eit omfang på 30 sp, spesialpensumet blir da auka med 30 sp.)
2. Emne/spesialpensum på 60 sp (90 sp ved kort oppgåve) utarbeidd i samråd med rettleiar

MERK: For å oppnå ein mastergrad i rein matematikk – algebra/algebraisk geometri må emnet MAT224 Kommutativ algebra eller tilsvarande vere gjennomført og bestått i løpet av bachelor- eller masterstudiet.

Masteroppgåve

I samråd med rettleiaren vel du ei masteroppgåve som svarer til 60 sp (Dersom du vil ha ei oppgåve på 30 sp, blir oppgåva først gitt etter at alle kursa er tekne, og oppgåva må skrivast som eit fulltidsstudium i slutten av mastergradsstudiet.) Oppgåva er eit forskingsbasert arbeid som gir deg innsikt i matematisk metodikk og bruk av matematiske metodar i ulike samanhengar. Temaet for oppgåva er avhengig av forskingsinteressene til rettleiaren.

Metode

Masterprogrammet skal gi innsikt i matematisk metodikk og matematiske metodar. Emnet for oppgåva er avgjerande for metoden du bruker.

Yrkesvegar

Masterprogrammet i rein matematikk gir ei teoretisk tyngd som er etterspurd i mange yrke, for eksempel innanfor tele- og informatikk, oljerelatert verksemd, forvalting, finans og forsikring og undervisning. Du kan for eksempel arbeide som lektor dersom du også tek praktisk-pedagogisk utdanning. Går du vidare med doktorgrad, er forskarstillingar innanfor universitet og høgskolar aktuelle.

Forkunnskaper

Alle bachelorgradar med eit minimum av matematiske forkunnskapar (minimum eitt års omfang og eit karaktersnitt på minst C) som dekkjer kalkulus (inkludert fleirvariabelteori), lineær algebra, algebra, reell analyse og litt topologi. Du bør helst ha kunnskapar som svarer til følgjande kurs ved UiB: MAT111, MAT112, MAT121, MAT211, MAT212, MAT220 og eitt av kursa MAT242/MAT243. (Sjå studentportal.uib.no for detaljar.)

Studiepoeng

120 Studiepoeng