Universitet: Masterprogram i matematikk - Matematisk analyse

For deg som synest at noko av det mest spennande med matematikken er overgangen frå eit spesialtilfelle til studiet av det underliggjande generelle rammeverket, kan eit masterstudium i rein matematikk vere eit givande alternativ. Den opphavlege tydinga av omgrepet matematisk analyse er nært knytt til funksjonar av éin eller fleire reelle variablar, men moderne analyse inneheld fleire andre emne, delvis av ein noko meir abstrakt natur, så som generell topologi, mål- og integralteori og funksjonalanalyse. I staden for å studere individuelle funksjonar er såkalla funksjonsrom eit sentralt tema. Vektorane i rommet er funksjonar definerte over eit gitt område. Spørsmål knytte til konvergens, integrasjon, derivasjon og approksimasjon blir studert innanfor ramma av slike rom. Sentrale idear frå endeleg dimensjonal lineær algebra speler også ei viktig rolle.

Oppbygging av studiet

Masterprogrammet i matematisk analyse omfattar:

1. Eit sjølvstendig vitskapleg arbeid (masteroppgåve) med eit omfang på 60 sp (Ein kan også få korte oppgåver med eit omfang på 30 sp, spesialpensumet blir da auka med 30 sp)
2. Emne/spesialpensum på 60 sp (90 sp ved kort oppgåve) utarbeidd i samråd med rettleiar.

MERK: For å oppnå ein mastergrad i matematikk – matematisk analyse må emna MAT214 Kompleks funksjonsteori og MAT215 Mål- og integralteori (eller tilsvarande) vere gjennomførte og bestått i løpet av bachelor- eller masterstudiet.

Masteroppgåve

I samråd med rettleiaren vel du ei masteroppgåve som svarer til 60 sp (Dersom du vil ha ei oppgåve på 30 sp, blir oppgåva først gitt etter at alle kursa er tekne, og oppgåva må skrivast som eit fulltidsstudium i slutten av mastergradsstudiet.) Oppgåva er eit forskingsbasert arbeid som gir deg innsikt i matematisk metodikk og bruk av matematiske metodar i ulike samanhengar. Temaet for oppgåva er avhengig av forskingsinteressene til rettleiaren.

Metode

Masterprogramma i matematikk skal gi innsikt i matematisk metodikk og matematiske metodar. Emnet for oppgåva er avgjerande for metoden du bruker.

Yrkesvegar

Ein mastergrad i rein matematikk gir ei teoretisk tyngd som er etterspurd i mange yrke, for eksempel innanfor tele- og informatikk, oljerelatert verksemd, forvalting, finans og forsikring og undervisning. Du kan for eksempel arbeide som lektor dersom du også tek praktisk-pedagogisk utdanning. Går du vidare med doktorgrad, er forskarstillingar ved universitet og høgskolar aktuelle

Forkunnskaper

Alle bachelorgradar med eit minimum av matematiske forkunnskapar (minimum eitt års omfang, og eit karaktersnitt på minst C) som dekkjer kalkulus (inkludert fleirvariabelteori), lineær algebra, reell analyse og funksjonsteori, kan kvalifisere for opptak. Du bør helst ha kunnskapar som svarer til følgjande kurs ved UiB: MAT111, MAT112, MAT121, MAT211, MAT212, MAT213 og MAT220 (Sjå studentportal.uib.no for detaljar).

Studiepoeng

120 Studiepoeng