Universitet: Bachelorprogram i pedagogikk

Studiet inneheld 30 studiepoeng innføringsemne medrekna ex.phil., og 90 studiepoeng med spesialisering (1½ års studium) innanfor pedagogiske fag. Du kan velje alle eller delar av dei siste 60 studiepoenga frå andre fag. Studiet er bygd opp av dei følgjande emna:

• Det første semesteret består av tre emne: 1) EX.PHIL., 2) EXFAC03P. og 3) POH100: innføring i pedagogikk og helsefremjande arbeid. Desse emna gir ei grunnleggjande innføring i ulike tenkjemåtar kring kunnskap og vitskap generelt, ein introduksjon til fagspesifikk historie og vitskapsteori, og ei innføring i faget pedagogikk og helsefremjande arbeid.
• PED111: Pedagogisk filosofi gir ei grunnleggjande innføring i pedagogisk filosofi og idéhistorie der omgrepa kunnskap, danning og medborgarskap utgjer sentrale kategoriar.
• PED112: Kommunikasjon, IKT og formidling gir ei grunnleggjande innføring i generell og spesifikk kommunikasjonsteori.
• PSYK202A/B: Forskingsmetodar gir ei generell innføring i grunnleggjande metodisk tenking og fokuserer på ulike tradisjonar innanfor utdanningsvitskapleg forsking.
• PED114: Utdanning i eit samfunn i endring retter merksemda mot oppgåva og funksjonen utdanningsinstitusjonar har i samfunnet ut frå eit historisk, sosiologisk, kulturelt og politisk perspektiv.
• PED211: Læring og pedagogiske prosessar gir ei innføring i forholdet mellom kunnskap, læring og læringsprosessar i ulike kontekstar.
• PED212: Gjennom arbeidet med bacheloroppgåva lærer du korleis eit fagleg sjølvstendig arbeid blir bygd opp. Du utviklar ein vitskapleg tenkje- og arbeidsmåte og lærer kva for krav som blir stilte til eit større skriftleg produkt.
• Blant valfrie emne kan du velje så godt som alle fag på høgskole- og universitetsnivå. Vi rår deg til å ta fag innan samfunnsvitskap, humaniora, psykologi og helsefag.

Nedanfor ser du korleis bachelorprogrammet i pedagogikk er lagt opp.

1. semester:

• EXPHIL Examen philosophicum (10 sp)
• EXFAC03P Examen facultatum, psykologi (10 sp)
• POH100 Innføring i pedagogikk og helsefremjande arbeid (10 sp)

2. semester:

• PED111 Pedagogisk filosofi (15 sp)
• PED112 Kommunikasjon, IKT og formidling (15 sp)

3. semester:

• PED114 Utdanning i eit samfunn i endring (15 sp)
• Valfritt emne (15 sp)

4. semester:

• PED211 Læring og pedagogiske prosessar (15 sp)
• PSYK202A Forskingsmetodar (15 sp)

5. semester

• Valfritt emne (15 sp)
• Valfritt emne (15 sp)

6. semester

• Valfritt emne (15 sp)
• PED212 Bacheloroppgåve (15 sp)

Eit bachelorstudium i pedagogikk vil gi deg eit kunnskapsfundament som vil kvalifisere for praktisk arbeid knytt til opplæring, personalarbeid og utvikling i ulike typar institusjonar. Som pedagog vil du tileigne deg kunnskap om og forståing for kommunikasjon, kunnskap og læring i eit kulturelt og samfunnsmessig perspektiv. Gjennom slik innsikt vil du kunne bidra konstruktivt i ei rekkje utviklingsprosessar.

Universitetsutdanna pedagogar arbeider for eksempel i media, med kulturformidling, som opplæringsleiarar eller pedagogiske konsulentar, og i liknande yrke både i offentleg og privat sektor. Fellesnemnaren for dei ulike yrkesvegane er at innsikt i og forståing av forholda mellom læring, kunnskap og kommunikasjon er etterspurt.