Universitet: Bachelorprogram i retorikk

Retorikk er læra om formålstenleg kommunikasjon. Det er læra om korleis ein på ein overtydande måte appellerer til sine medmenneske. Anten du diskuterer med venner, held ein politisk tale, skriv ein omtale eller utviklar ei reklamekampanje, så praktiserer du retorikk. Heilt frå Aristoteles og sofistane til kommunikasjonsforskinga i våre dagar har mennesket prøvd å greie ut korleis vi påverkar kvarandre. Kvifor blir vi påverka og overtydde av enkelte, men ikkje av andre? Kva gjer ei form for retorikk formålstenleg eller overtydande og ei anna problematisk eller ineffektiv?

Studieprogrammet gir ei historisk og systematisk innføring i retorikken som generell kommunikasjons- og argumentasjonslære. Vi ser på retorikken i forhold til kulturelle, historiske og situasjonelle tilhøve. Vi drøftar retorikkens forhold til sjangrar, medium og formidlingsmåtar. Og vi går tett på retorikk som argumentasjon, estetikk og etikk.

Som kommunikasjonslære har retorikken vakse fram frå praksis. Ein har observert kvifor enkelte lukkast og andre feilar. Ut frå dette har ein laga teoretiske retningslinjer for den gode og den effektive kommunikasjonen. Retorikkprogrammet er ikkje ei profesjons- eller praksisutdanning, men programmet ønskjer å føre forbrødringa mellom teori og praksis vidare ved også å la deg jobbe med praktiske kommunikasjonsoppgåver der du får øvd opp din eigen formidlingskompetanse.

Føremålet med studieprogrammet i retorikk er:

- å gi deg innsikt i utviklinga av det retoriske fagfeltet frå antikken fram til dagens mediesamfunn.

- å gi deg innsikt i sentrale teoriar på feltet frå dei klassiske innføringane i kunsten å tale til aktuelle nyretoriske framstillingar, samt retorikken i vår tids medium.

- å gi deg kompetanse i retorisk analyse og evaluering av ulike tekstformer og sjangrar.

- å gi deg kompetanse i praktisk retorisk kommunikasjon og formidling.

Bachelorprogrammet i retorikk skal innehalde inntil 30 studiepoeng med innføringsemne medrekna ex.phil., og 90 studiepoeng (1½ års studium) med spesialisering innanfor eitt av programfaga eller ein godkjend fagkombinasjon. Det første semesteret skal førebu deg fagleg og metodisk til vidare studium, og inneheld tre emne. Akademisk skriving gir deg teoretisk innføring og praktisk øving i å lese og produsere akademiske tekstar. Examen philosophicum gir deg ei innføring i sentrale spørsmål som gjeld kunnskap, moral, venleik, språk, tolking og logikk. Det siste emnet er tekst og kultur, som gir deg ei oversikt over mangfaldet i og samanhengane mellom ulike fag.

Dei siste 60 studiepoenga er obligatoriske programemne og valfrie emne. I det første semesteret introduserer examen philosophicum generelle, retoriske problemstillingar, medan emnet akademisk skriving introduserer visse aspekt av allmenn og praktisk retorikk. I det andre semesteret må du følgje det obligatoriske emnet i allmenn og praktisk retorikk. Emnet gir eit felles grunnlag for dei resterande valfrie retorikkemna. Samstundes må du ta eit emne i spesialiseringsfaget ditt. I kvart av dei følgjande fem semestra vel du eit retorikkemne i kombinasjon med eit emne frå faget du spesialiserer deg i. Retorikkemnet i spesialiseringsfaget er obligatorisk.

Bachelorprogrammet i retorikk vil da kunne sjå slik ut:

1. semester (haust) Examen philosophicum (10 studiepoeng), Akademisk skriving (10 studiepoeng), Tekst og kultur (10 studiepoeng)

2. semester (vår) Allmenn og praktisk retorikk + Spesialiseringsfag

3. semester (haust) Valfritt retorikkemne + Spesialiseringsfag

4. semester (vår) Retorikkemne i spesialiseringsfaget + Spesialiseringsfag

5. semester (haust) Valfritt retorikkemne eller frie studiepoeng + Spesialiseringsfag

6. semester (vår) Utveksling + Spesialiseringsfag

(Val av spesialiseringsfag kan påverke rekkjefølgja av retorikkemna.)

I haustsemesteret kan du velje mellom følgjande valfrie retorikkemne:

- Førmoderne visuell retorikk

- Klassisk retorikk

- Medieretorikk (annankvar haust)

- Vår tids visuelle retorikk (annankvar haust)

I vårsemesteret kan du velje mellom følgjande valfrie retorikkemne:

- Nordisk retorikk

- Litteraturvitskapleg retorikk

Bachelorprogrammet i retorikk gir både allmennkunnskapar som kan nyttast i ei rekkje yrkessamanhengar og spesialkunnskap i formidling og kommunikasjon. Studiet gir deg allmenn kompetanse i å analysere, evaluere og produsere formålstenleg kommunikasjon. Dette kan til dømes vere kunnskap og kompetanse som er nyttig for deg som ønskjer å jobbe med informasjons- og kommunikasjonsarbeid, undervisning, reklame, journalistikk og ei rekkje former for skribent- og tekstarbeid.

Ved påbygging til mastergrad får du kvalifikasjonar for vidare studium og for forsking, formidling og undervisning på høgare nivå.

Spesialisering