Politihøgskolen - Bodø

Om Politihøgskolen - Bodø

Politihøgskolen, avdeling Bodø, held til i moderne lokale på Mørkved, 8 km frå Bodø sentrum og vegg i vegg med Høgskolen i Bodø. Bodø-avdelinga til Politihøgskolen er ein liten høgskole, med rundt 190 studentar og 24 tilsette. Studentmiljøet i Bodø blir framheva som svært godt. Det er lite og oversynleg, og alle kjenner alle.

Klasserom og auditorium er lyse og trivelege, og skolen har god tilgang på grupperom. Ein del undervisning går føre seg i spesialrom, som datarom, øvingsleilegheit, kriminalteknisk undervisningsrom og øvingssimulator. Trådlaust nettverk er installert.

Bodø som studieby
Med om lag 45 000 innbyggjarar er Bodø den største byen i Nordland, fylkeshovudstad og eit knutepunkt for kommunikasjon. www.bodo.no

Bodø har eit rikt kulturliv og pulserande uteliv med pubar, restaurantar, kafear og kino. Kulturhuset byr på teater, revyframsyningar og konserttilbod i tallause former og smaksvariantar. www.bodo-kulturhus.no

I Bodø Spektrum finn du mellom anna Nordlandsbadet – eit splitter nytt og moderne badeland – og Nordlandshallen – ein innandørs fotballbane med internasjonale mål.

Bodø by har i dag eit av dei flottaste og mest publikumsvennlege kaiområda i landet. Her kan du sitje på bryggjekanten og kjøpe reker rett over båtripa ein sommardag, eller kjenne på naturkreftene i ein forrykande sørveststorm ein haust- eller vinterdag.

Se kurstilbud fra Politihøgskolen - Bodø